pahle to ek KHwab tha KHakistar-o-KHawar ke beach
ab andheri shab hai hail us ke mere ghar ke beach
hadse jaise hain sab dekhe hue samjhe hue
koi hairani nahin ab aankh aur manzar ke beach
sab sipahi apni apni zat mein masruf the
shahzada ab ke tanha hi laDa lashkar ke beach
asr-e-hazir ke siwa bhi kuchh zamane aur hain
kuchh manazir aur bhi hain aasman manzar ke beach
ek ye tariKH hai paDhte hain jis ko aaj hum
ek alag tariKH bhi hai ram ke babar ke beach
lo 'qamar'-sahab zamana chaal apni chal gaya
aap itna hi chale bas ghar ke aur daftar ke beach
Ghazal
Pahle to ek KHwab tha KHakistar-o-KHawar ke beach
Qamar Siddiqi