pas us but ke jo ghair aa ke koi baiTh gaya
dard uTTha ya mere jis mein ki ji baiTh gaya
ishq-e-mizhgan mein hazaron ne gale kaTwae
id-e-qurban mein jo wo le ke chhuri baiTh gaya
jab raqib us ko batane lage arkan-e-namaz
tham kar dil kabhi uTTha main kabhi baiTh gaya
ai jila-saz kabhi phir na safai hogi
zang aaina-e-dil mein jo zara baiTh gaya
dast-o-pa hote hain har war mein lakhon ke do nim
hath chaurang pe mashq us ne jo ki baiTh gaya
chashma-e-gor wo hai us se na nikla koi
us kunen mein jo gira Dubte hi baiTh gaya
tham kyunkar nahin lete hain wo dil dekhen to
tir-e-nala jo nishane pe koi baiTh gaya
phuT bahta jo ye ai 'shad' to behtar hota
phir ye ubhrega phaphola jo abhi baiTh gaya
Ghazal
Pas us but ke jo ghair aa ke koi baiTh gaya
Shad Lakhnavi