nit-nae rang mein nikalta hun
apne KHwabon ke sath chalta hun
tare apne safar mein rahte hain
aur main apni rah chalta hun
gumrahi rah KHud nikalti hai
nae raston pe jab nikalta hun
dur rahta hun shah-rahon se
aur pagDanDiyon pe chalta hun
panw apne hain laghzishen apni
KHud hi girta hun KHud sambhalta hun
barf rahta hun sard lamhon mein
dhup ke sath bah nikalta hun
main hi qaus-e-quzah mein hun 'betab'
mausamon mein bhi main badalta hun
Ghazal
Nit-nae rang mein nikalta hun
Pritpal Singh Betab