natija tajassus ka behtar bhi hai
mashaqqat ki tah mein muqaddar bhi hai
nadi par karna hi kafi nahin
abhi raste mein samundar bhi hai
agar ghar ko chhoDen to jaen kahan
qayamat to khiDki se bahar bhi hai
gulabon ka dhoka na khae koi
azizon ki jholi mein patthar bhi hai
nahin nind aankhon mein tujh bin meri
KHunuk raat hai tan pe chadar bhi hai
batao zamane mein 'athar' tumhein
sukun ek din ko mayassar bhi hai
Ghazal
Natija tajassus ka behtar bhi hai
athar shakeel