na apne zabt ko ruswa karo sata ke mujhe
KHuda ke waste dekho na muskura ke mujhe
siwae dagh mila kya chaman mein aa ke mujhe
qafas nasib hua aashiyan bana ke mujhe
adab hai main jo jhukae hue hun aankh apni
ghazab hai tum jo na dekho nazar uTha ke mujhe
ilahi kuchh to ho aasan naza ki mushkil
dam-e-aKHir to taskin de wo aa ke mujhe
KHuda ki shan hai main jin ko dost rakhta tha
wo dekhte bhi nahin ab nazar uTha ke mujhe
meri qasam hai tumhein rahrawan-e-mulk-e-adam
KHuda ke waste tum bhulna na ja ke mujhe
hamara kaun Thikana hai hum to 'bismil' hain
na apne aap ko ruswa karo sata ke mujhe
Ghazal
Na apne zabt ko ruswa karo sata ke mujhe
Bismil Azimabadi