Musibat mein bhi ghairat-ashna KHamosh rahti hai

musibat mein bhi ghairat-ashna KHamosh rahti hai
ki durweshon ki hajat to sada KHamosh rahti hai

KHushi ka jashn ho ya matam-e-marg-e-tamanna ho
yahan har haal mein KHalq-e-KHuda KHamosh rahti hai

shajar ko wajd aata hai na to shaKHen lachakti hain
bahaaron mein bhi ab baad-e-saba KHamosh rahti hai

meri chashm-e-talab mein KHwab ka hangama KHema-zan
magar tabir misl-e-kaj-ada KHamosh rahti hai

darun-e-KHana-e-dil roz o shab mahshar bapa lekin
zaban apni barae-tajraba KHamosh rahti hai

chamak uThte hain jab chehre tab-o-tab-e-tamanna se
to phir shaistagi-e-aina KHamosh rahti hai

mere chaaron taraf aks-e-tilism-e-samri raushan
KHamoshi chiKHti hai aur sada KHamosh rahti hai

laraz jati hain palken ashk jam jate hain aankhon mein
jab apni KHwahish-e-be-saKHta KHamosh rahti hai

daraKHton ki baghawat hai ki ye mausam ki be-rahmi
ki jangal aah bharta hai hawa KHamosh rahti hai