محبت کی فراوانی مبارک
تمہیں آنکھوں کی طغیانی مبارک
تمہارا چاند پورا ہو گیا ہے
تمہیں ٹھہرا ہوا پانی مبارک
اتر آیا ہے دل میں نور کوئی
تمہیں چہرے کی تابانی مبارک
کسی پر پھر یقیں کرنے لگے ہو
تمہیں پھر سے یہ نادانی مبارک
تم اپنی بات کہنا جانتے ہو
تمہیں لفظوں کی آسانی مبارک
تمہیں یہ شور و غل نیرنگ دنیا
ہمیں صحرا کی ویرانی مبارک
کوئی صورت مرتب ہو رہی ہے
خیالوں کی پریشانی مبارک
غزل
محبت کی فراوانی مبارک
منیش شکلا