misal-e-KHwab hamesha kisi safar mein rahe
hum apni nind mein bhi us ki rahguzar mein rahe
kisi ki yaad ke baadal barasne wale the
bahut KHarab tha mausam so aaj ghar mein rahe
tamam umr usi jism se shikayat thi
tamam umr usi jism ke khanDar mein rahe
mata-e-dard ko aaKHir kahan kahan rakhte
so mere ganj-e-giran-maya-e-hunar mein rahe
ye zindagi hai 'qamar' ya ki jangalon ka safar
har ek lamha yahan rah-e-pur-KHatar mein rahe
Ghazal
Misal-e-KHwab hamesha kisi safar mein rahe
Qamar Siddiqi