Meri zindagi pe na muskura mujhe zindagi ka alam nahin

meri zindagi pe na muskura mujhe zindagi ka alam nahin
jise tere gham se ho wasta wo KHizan bahaar se kam nahin

mera kufr hasil-e-zohd hai mera zohd hasil-e-kufr hai
meri bandagi wo hai bandagi jo rahin-e-dair-o-haram nahin

mujhe ras aaen KHuda kare yahi ishtibah ki saaten
unhen aitabar-e-wafa to hai mujhe aitabar-e-sitam nahin

wahi karwan wahi raste wahi zindagi wahi marhale
magar apne apne maqam par kabhi tum nahin kabhi hum nahin

na wo shan-e-jabr-e-shabab hai na wo rang-e-qahr-e-itab hai
dil-e-be-qarar pe in dinon hai sitam yahi ki sitam nahin

na fana meri na baqa meri mujhe ai 'shakil' na DhunDhiye
main kisi ka husn-e-KHayal hun mera kuchh wajud o adam nahin