Meri ghazal ki tarah uski bhi hukumat hai

meri ghazal ki tarah us ki bhi hukumat hai
tamam mulk mein wo sab se KHub-surat hai

kabhi kabhi koi insan aisa lagta hai
purane shahr mein jaise nai imarat hai

jami hai der se kamre mein ghibaton ki nashist
faza mein gard hai mahaul mein kudurat hai

bahut dinon se mere sath thi magar kal sham
mujhe pata chala wo kitni KHub-surat hai

ye zairan-e-ali-gaDh ka KHas tohfa hai
meri ghazal ka tabarruk dilon ki barakat hai