Dil ishq ka hamesha harif-e-nabard tha

dil ishq ka hamesha harif-e-nabard tha
ab jis jagah ki dagh hai yan aage dard tha

ek gard-e-rah tha pai-e-mahmil tamam rah
kis ka ghubar tha ki ye dumbaala gard tha

dil ki shikastagi ne Darae rakha hamein
wan chin jabin par aai ki yan rang zard tha

manind-e-harf safha-e-hasti se uTh gaya
dil bhi mera jarida-e-alam mein fard tha

tha pusta reg-e-baad ye ek waqt karwan
ye gard-baad koi bayaban naward tha

guzri mudam us ki jawanan-e-mast mein
pir-e-mughan bhi turfa koi pir mard tha

aashiq hain hum to 'mir' ke bhi zabt-e-ishq ke
dil jal gaya tha aur nafas lab pe sard tha