Kis husn se kahun main uski KHush-aKHtari ki

kis husn se kahun main us ki KHush-aKHtari ki
is mah-ru ke aage kya tab mushtari ki

rakhna na tha qadam yan jun baad be-tammul
sair is jahan ki rahraw par tu ne sarsari ki

shubha bahaal sag mein ek umr sirf ki hai
mat puchh in ne mujh se jo aadmi-gari ki

pae gul us chaman mein chhoDa gaya na hum se
sar par hamare ab ke mannat hai be-pari ki

pesha to ek hi tha us ka hamara lekin
majnun ke taleon ne shohrat mein yawari ki

girye se dagh-e-sina taza hue hain sare
ye kisht-e-KHushk tu ne ai chashm phir hari ki

ye daur to muafiq hota nahin magar ab
rakhiye bina-e-taza is charKH-e-chambari ki

KHuban tumhaari KHubi ta-chand naql kariye
hum ranja-KHatiron ki kya KHub dilbari ki

hum se jo 'mir' uD kar aflak-e-charKH mein hain
un KHak mein malun ki kahe ko hamsari ki