mazid ek bar par bar-e-giran rakkha gaya hai
zamin jo tere upar aasman rakkha gaya hai
kabhi tu chiKH kar aawaz de to jaan jaun
mere zindan mein tujh ko kahan rakkha gaya hai
meri nindon mein rahti hai sada tishna-dahani
mere KHwabon mein ek dariya rawan rakkha gaya hai
hawa ke sath phulon se nikalne ki saza mein
bhaTakti KHushbuon ko be-aman rakkha gaya hai
magar ye dil bahalta hi nahin go is ke aage
tumhaare baad ye sara jahan rakkha gaya hai
Ghazal
Mazid ek bar par bar-e-giran rakkha gaya hai
Ameer Imam