مسجدوں میں قتل ہونے کی روایت ہے یہاں

مسجدوں میں قتل ہونے کی روایت ہے یہاں
اور جسے بھی دیکھیے وہ باجماعت ہے یہاں

ان کے سر میں سر ملا کر چیختی خلقت تمام
دیکھیے اک جھوٹ میں بھی کتنی طاقت ہے یہاں

اور اس دعوے کی ہم تردید کر سکتے نہیں
لوگ کہتے ہیں محبت ہی محبت ہے یہاں

فیصلہ یہ بھی عدالت کو ہی کرنے دیجئے
آپ کو انصاف کی کتنی ضرورت ہے یہاں

ہم یہ جنگل چھوڑنے والے نہیں سن لیجئے
بھیڑیوں میں اب بھی تھوڑی آدمیت ہے یہاں