مسئلے بھی مرے ہم راہ چلے آتے ہیں

مسئلے بھی مرے ہم راہ چلے آتے ہیں
حوصلے بھی مرے ہم راہ چلے آتے ہیں

کچھ نہ کچھ بات مرے عزم سفر میں ہے ضرور
قافلے بھی مرے ہم راہ چلے آتے ہیں

جب بھی اے دوست تری سمت بڑھاتا ہوں قدم
فاصلے بھی مرے ہم راہ چلے آتے ہیں

غم مرے ساتھ نکلتے ہیں سویرے گھر سے
دن ڈھلے بھی مرے ہم راہ چلے آتے ہیں

پا برہنہ جو گزرتا ہوں ترے کوچے سے
آبلے بھی مرے ہم راہ چلے آتے ہیں

میرے ماحول میں ہر سمت برے لوگ نہیں
کچھ بھلے بھی مرے ہم راہ چلے آتے ہیں

جب بھی کرتا ہے قبیلہ مرا ہجرت رزمیؔ
زلزلے بھی مرے ہم راہ چلے آتے ہیں