مرکز حرف تکلم تھا بیاں تک نہ ہوا

مرکز حرف تکلم تھا بیاں تک نہ ہوا
اک ترا ذکر تھا جو میری زباں تک نہ ہوا

شوق پرواز میں پر ٹوٹ گئے طائر کے
وہ یقیں تھا کہ مرے دل کو گماں تک نہ ہوا

کیا عجب طرفہ تماشا ہے تری بستی میں
میں نے اک عمر گزاری ہے مکاں تک نہ ہوا

جس کے ہونے پہ نہ ہونے کا گماں ہوتا ہے
وہی گلدستۂ جاں صرف خزاں تک نہ ہوا

میں نے دنیا تری تخلیق پہ سوچا تھا بہت
راز گم گشتہ‌ٔ محبوب عیاں تک نہ ہوا

بس کہ اب ختم ہوا سلسلۂ سوز و گداز
دل مرا جل بھی گیا اور دھواں تک نہ ہوا

زندگی حرف فنا کے لیے تحریک قمرؔ
روح باقی رہی اور کوئی زیاں تک نہ ہوا