Maqam-e-hosh se guzra makan se la-makan pahuncha

maqam-e-hosh se guzra makan se la-makan pahuncha
tumhaare ishq mein diwana-e-manzil kahan pahuncha

nazar ki manzilon mein bas tumhin husn-e-mujassam the
mata-e-arzu le kar main ulfat mein jahan pahuncha

usi ne ishq ban kar do-jahan ko phunk Dala hai
wo shoala jo teri nazron se dil ke darmiyan pahuncha

junun zahir hua ruKH par KHudi par be-KHudi chhai
ba-qaid-e-hosh main jab bhi qarib-e-astan pahuncha

tum apni justuju mein ye mera shauq-e-talab dekho
tumhaare ishq mein luT kar bhi tum tak jaan-e-jaan pahuncha

talluq toD kar jaan-e-jahan sare zamane se
main pahuncha tha jahan mujh ko teri KHatir wahan pahuncha

'fana' wo jalwa-gar hone lage har bazm-e-iman mein
mera dil le ke jab mujh ko sar-e-ku-e-butan pahuncha