میں چھو سکوں تجھے میرا خیال خام ہے کیا

میں چھو سکوں تجھے میرا خیال خام ہے کیا
ترا بدن کوئی شمشیر بے نیام ہے کیا

مری جگہ کوئی آئینہ رکھ لیا ہوتا
نہ جانے تیرے تماشے میں میرا کام ہے کیا

اسیر خاک مجھے کر کے تو نہال سہی
نگاہ ڈال کے تو دیکھ زیر دام ہے کیا

یہ ڈوبتی ہوئی کیا شے ہے تیری آنکھوں میں
ترے لبوں پہ جو روشن ہے اس کا نام ہے کیا

مجھے بتا میں تری خاک اب کہاں رکھ دوں
کہ زیبؔ ارض و سما میں ترا مقام ہے کیا