محفل میں اس پہ رات جو تو مہرباں نہ تھا

محفل میں اس پہ رات جو تو مہرباں نہ تھا
ایسا سبک تھا غیر کہ کچھ بھی گراں نہ تھا

وصل بتاں میں خوف فراق بتاں نہ تھا
گویا کہ اپنے سر پہ کبھی آسماں نہ تھا

پیش رقیب پرسش دل تم نے خوب کی
دشمن تھا پردہ دار نہ تھا راز داں نہ تھا

عبرت دلا چکی تھی ہماری ستم کشی
مطلق شب وصال عدو شادماں نہ تھا

بگڑے ہوئے رقیب سے وہ آئے میرے گھر
اس حسن اتفاق کا کوئی گماں نہ تھا

سرگرم نالہ کیوں رہی بلبل بہار میں
کیا ہم نہ تھے اسیر کہ ذوق فغاں نہ تھا

سرشار بے خودی تھے اثرؔ بزم یار میں
کیا جانیں ہم رقیب کہاں تھا کہاں نہ تھا