مآل دوستی کہیے حدیث مہوشاں کہیے

مآل دوستی کہیے حدیث مہوشاں کہیے
ملے دل سے ذرا فرصت تو دل کی داستاں کہیے

مگر اس خامشی سے اہل دل کا کچھ بھرم تو ہے
جو کچھ کہیے تو ساری عمر کی محرومیاں کہیے

غم دل اولیں دور تمنا کی امانت ہے
نوید عیش اگر سنیے نصیب دشمناں کہیے

جو رکھ لے خستگی کی شرم ایسی برق رحمت ہے
گرے جو آشیاں سے دور اس کو بے اماں کہیے

ہمارا کیا ہے ناصح ہم اسے نا مہرباں کہہ دیں
پر ایسا بھی تو ہو کوئی کہ جس کو مہرباں کہیے

کسی سے بھی نہ کہیے حال دل بے مہر دنیا میں
یہاں سب کچھ بہ انداز حدیث دیگراں کہیے

بس اب اٹھیے کہ ننگ پرسش بے جا قیامت ہے
کہاں تک ایک اک بے نام سے نام و نشاں کہیے