likh raha hun harf-e-haq harf-e-wafa kis ke liye
mangta hun zinda rahne ki dua kis ke liye
phul hain sab ek gulshan ke to phir taKHsis kyun
sehn-e-gulshan mein ye zahrili hua kis ke liye
main to nakaam mohabbat hun chalo ruswa hua
tau bata hai tera paiman-e-wafa kis ke liye
main to ek KHwahish ki bhi takmil par qadir nahin
ye shikwa KHusrawana ye ana kis ke liye
mujh ko KHush-fahmi nahin hai ai hawa phir bhi bata
muztarib hai wo taghaful aashna kis ke liye
kho chuka hai us ko jab to KHud hi ai sultan-'rashk'
ab dhaDakta hai dil-e-be-muddaa kis ke liye
Ghazal
Likh raha hun harf-e-haq harf-e-wafa kis ke liye
Sultan Rashk