لب پہ کانٹوں کے ہے فریاد و بکا میرے بعد

لب پہ کانٹوں کے ہے فریاد و بکا میرے بعد
کوئی آیا ہی نہیں آبلہ پا میرے بعد

میرے دم تک ہی رہا ربط نسیم و رخ گل
نکہت آمیز نہیں موج صبا میرے بعد

اب نہ وہ رنگ جبیں ہے نہ بہار عارض
لالہ رویوں کا عجب حال ہوا میرے بعد

چند سوکھے ہوئے پتے ہیں چمن میں رقصاں
ہائے بیگانگی آب و ہوا میرے بعد

منہ دھلاتی نہیں غنچوں کا عروس شبنم
گرد آلود ہے کلیوں کی قبا میرے بعد

آدمیت شکنی بھی تو نہیں کم انورؔ
ڈر ہے کچھ اور نہ ہو اس کے سوا میرے بعد