کیا دن تھے جب چھپ چھپ کر تم پاس ہمارے آتے تھے

کیا دن تھے جب چھپ چھپ کر تم پاس ہمارے آتے تھے
کانپتے تھے بدنامی کے ڈر سے آنسو پی پی جاتے تھے

ہائے جوانی کیا موسم تھا اب وہ دن یاد آتے ہیں
روٹھتے تھے ہم ہر دم ان پہ اور وہ آ کے مناتے تھے

ہائے غضب ہے مجھ وحشی کو اس موسم میں قید کیا
سن جب شور فصل بہاراں مرغ قفس گھبراتے تھے

ذکر کیا میں آپ کا کس سے کس کے آگے نام لیا
دشمن تھے وہ لوگ مرے جو آپ کے تئیں بہکاتے تھے

ہائے وہ پہلے چاہ کا عالم کس سے میں اظہار کروں
میں تو حجاب سے آپ خجل تھا وہ مجھ سے شرماتے تھے

اس سے ہوسؔ ملنا مشکل تھا پر وہ ہم سے دور نہ تھے
ان کی ہی تصویر سے ہر دم اپنا جی بہلاتے تھے