Kuchh phul the kuchh abr tha kuchh baad-e-saba thi

kuchh phul the kuchh abr tha kuchh baad-e-saba thi
kuchh waqt tha kuchh waqt se bahar ki faza thi

kuchh rang the kuchh dhup thi kuchh dahshat-e-anjam
kuchh sans the kuchh sans mein KHushbu-e-fana thi

kuchh rang-e-shafaq tez tha kuchh aankh mein KHun tha
kuchh zehn pe chhai tere hathon ki hina thi

kuchh guzri hui umr ki yaadon ka fusun tha
kuchh aate hue waqt ke qadmon ki sada thi

sadiyon se dhaDakti hui ek chap thi dil mein
ek ek ghaDi surat-e-naqsh-e-kaf-e-pa thi

donon ko wahi ek bikhar jaane ka Dar tha
main tha gul-e-sad-chaak tha aur tez hawa thi

'KHurshid' sar-e-sham tah-e-daman-e-kohsar
dil tha ki wahi koh ki derina nida thi