کوئی دو چار نہیں محو تماشا سب ہیں

کوئی دو چار نہیں محو تماشا سب ہیں
مرے احساس کی آواز میں زندہ سب ہیں

کوئی جگنو کوئی تارا کوئی سورج کوئی چاند
اور عجب بات کہ محروم اجالا سب ہیں

اس جگہ بھی نہ ہوئی درد کی لذت محسوس
میں سمجھتا تھا جہاں میرے شناسا سب ہیں

یوسف وقت پریشان نہ ہوتے کیونکر
کوئی انگلی نہ کٹی اور زلیخا سب ہیں

عرصۂ حشر کی تصویر عجب ہے امجدؔ
بے کراں بھیڑ ہے اور بھیڑ میں تنہا سب ہیں