کوئی بینڈ باجا سا کانوں میں تھا

کوئی بینڈ باجا سا کانوں میں تھا
عجب شور اونچے مکانوں میں تھا

پڑا تھا میں اک پیڑ کی چھاؤں میں
لگی آنکھ تو آسمانوں میں تھا

برہنہ بھٹکتا تھا سڑکوں پہ میں
لباس ایک سے اک دکانوں میں تھا

نظر میرے چہرے پہ مرکوز تھی
دھیان اس کا ٹیبل کے خانوں میں تھا

زمیں چھوڑنے کا انوکھا مزا
کبوتر کی اونچی اڑانوں میں تھا

مجھے مار کے وہ بھی روتا رہا
تو کیا وہ میرے مہربانوں میں تھا