kitne anjaan jaziron mein mujhe le ke chala
dil ki an-dekhe zamanon mein mujhe le ke chala
main ne kya rang sajae the tere KHwabon mein
aur tu kaise sarabon mein mujhe le ke chala
be-ridai ke bhi din dekhne wale the ki jab
hakim-e-waqt asiron mein mujhe le ke chala
use malum tha nisbat meri sadat se hai
jo baraste hue tiron mein mujhe le ke chala
jab bhi khola hai da-e-shahr-e-masarrat to koi
phir se nashad jahanon mein mujhe le ke chala
dil ko be-rang si mahfil hi faqat bhati thi
wahi viran se chehron mein mujhe le ke chala
ja rahi thi main kidhar ko magar ai umr-e-rawan
waqt ye kaun se lamhon mein mujhe le ke chala
Ghazal
Kitne anjaan jaziron mein mujhe le ke chala
Shabnam Shakeel