kisi KHayal ki rau mein tha muskuraate hue
magar wo chaunk paDa tha nazar milate hue
chamak thi ek pas-e-diwar saiqa-bar-dosh
ki taq o dar the shab-e-mah mein nahate hue
magar nawishta-e-diwar la-zawali hai
zamana karwaTen leta hai aate jate hue
kabhi kabhi koi lamha bhi jawedani hai
guzar gain kai sadiyan yahi sunate hue
jo rah gaya tha kahin ek sahab-e-na-rafta
bikhar ke KHak hua panw laDkhaDate hue
main Dagmagaya to sahil ka tha na maujon ka
chamak rahi thi nadi aasman uDate hue
zara si raushni phuTi to subh-dam suraj
faza mein Dub gaya aastin chaDhate hue
koi kisi ka nahin is sara-e-fani mein
koi charagh bujha ye sada lagate hue
Ghazal
Kisi KHayal ki rau mein tha muskuraate hue
Syed Amin Ashraf