خشک آنکھوں سے کوئی پیاس نہ جوڑی ہم نے

خشک آنکھوں سے کوئی پیاس نہ جوڑی ہم نے
آس ہم سے جو شرابوں کو تھی توڑی ہم نے

بارہا ہم کو ملا اپنے لہو میں وہ شرر
اپنی دکھتی ہوئی رگ جب بھی نچوڑی ہم نے

جو سنورنے کو کسی طور بھی راضی نہ ہوئی
بھاڑ میں پھینک دی دنیا وہ نگوڑی ہم نے

اس طرح ہم نے سمندر کو پلایا پانی
اپنی کشتی کسی ساحل پہ نہ موڑی ہم نے

جب کوئی چاند ملا داغ نہ دیکھے اس کے
آنکھ سورج سے ملا کر نہ سکوڑی ہم نے

گرد غیرت کے بدن پر جو نظر آئی کبھی
دیر تک اپنی انا خوب جھنجھوڑی ہم نے