KHirad ke pas KHabar ke siwa kuchh aur nahin

KHirad ke pas KHabar ke siwa kuchh aur nahin
tera ilaj nazar ke siwa kuchh aur nahin

har ek maqam se aage maqam hai tera
hayat zauq-e-safar ke siwa kuchh aur nahin

giran-baha hai to hifz-e-KHudi se hai warna
guhar mein aab-e-guhar ke siwa kuchh aur nahin

ragon mein gardish-e-KHun hai agar to kya hasil
hayat soz-e-jigar ke siwa kuchh aur nahin

urus-e-lala munasib nahin hai mujh se hijab
ki main nasim-e-sahar ke siwa kuchh aur nahin

jise kasad samajhte hain tajiran-e-farang
wo shai mata-e-hunar ke siwa kuchh aur nahin

baDa karim hai 'iqbaal'-e-be-nawa lekin
ata-e-shola sharar ke siwa kuchh aur nahin