خاک صحراؤں کی پلکوں پہ سجا لی ہم نے
زندگی جیسی ملی ہنس کے نبھا لی ہم نے
جام غم پیتے رہے مے کا سہارا نہ لیا
درمیاں درد کے اک راہ نکالی ہم نے
شہر در شہر پھرے دشت و دمن میں بھٹکے
مسند قیس دل و جاں سے سنبھالی ہم نے
ہم بھی اشکوں کی تجارت کا ہنر رکھتے ہیں
اشک ارزاں تھے بہت شرح بڑھا لی ہم نے
لمحہ لمحہ ترے احساس نے کروٹ بدلی
رات خوابوں پہ جمی گرد ہٹا لی ہم نے
ہم سے پوچھا تھا کسی نے کہ محبت کیا ہے
بے خودی میں تری تصویر بنا لی ہم نے
روٹھ کر شہر نگاراں کے چلن سے ذاکرؔ
اپنی دنیا ہی بہت دور بسا لی ہم نے
غزل
خاک صحراؤں کی پلکوں پہ سجا لی ہم نے
ذاکر خان ذاکر