kahte ho mujhe be-adab KHair main be-adab sahi
tum se shikayat-e-sitam jab na sahi to ab sahi
bazm-e-aza-e-dost mein gham na sahi tarab sahi
hans na sako jo khul ke tum to KHanda-e-zer-e-lab sahi
jitni hon mehrbaniyan rakhiye wo ghair ke liye
aur sitam hon jis qadar mere liye wo sab sahi
mujh par agar karam nahin us ka mujhe alam nahin
koi na koi baat ho qahr sahi ghazab sahi
lutf-e-karam na ho na ho kam hai wo kya ata ho jo
kawish-e-be-sabab sahi kulfat-e-be-talab sahi
shauq se kah ke bad-nasib aap use pukariye
nam 'rashid' hai to ho aur bhi ek laqab sahi
Ghazal
Kahte ho mujhe be-adab KHair main be-adab sahi
Rasheed Rampuri