کہیں سے باس نئے موسموں کی لاتی ہوئی

کہیں سے باس نئے موسموں کی لاتی ہوئی
ہوائے تازہ در نیم وا سے آتی ہوئی

بطور خاص کہاں اس طرف صبا کا گزر
کبھی کبھی یونہی رکتی ہے آتی جاتی ہوئی

میں اپنے دھیان میں گم تھا اور ایک ساعت شوخ
گزر گئی مری حالت پہ مسکراتی ہوئی

لہو میں تیرتی خاموشیوں کے ساتھ کہیں
بھٹک رہی ہے کوئی چیخ سنسناتی ہوئی

سراب خواہش آسودگی مگر کوئی شے
ملی نہیں ہے طبیعت سے میل کھاتی ہوئی

یہاں وہاں ہیں کئی خواب جگمگاتے ہوئے
کہیں کہیں کوئی تعبیر ٹمٹماتی ہوئی