Kaha tha humne tujhe to ai dil ki chah ki mai ko tu na pina

kaha tha hum ne tujhe to ai dil ki chah ki mai ko tu na pina
jo is ko pi kar tu aisa bahka ki hum ko mushkil hua hai jina

jo aankhen chanchal ki dekhen hum ne to nok-e-mizhgan ne dil ko cheda
nigah ne hosh-o-KHirad ko luTa ada ne sabr-o-qarar chhina

kaha jo hum ne ki aan lagiye hamare sine se is dam ai jaan
to sun ke us ne haya ki aisi ki aaya munh par wahin pasina

kiya hai ghussa mein hath la kar mera gareban jo TukDe us ne
phaTa hi rahna hai ab to behtar nahin munasib kuchh is ko sina

kaha tha aaunga do hi din mein wale na aaya wo shoKH ab tak
gina jo hum ne 'nazir' dil mein to us suKHan ko hua mahina