جو نقش برگ کرم ڈال ڈال ہے اس کا
تو دشت آگ اگلتا جلال ہے اس کا
دیار دیدہ و دل میں میں سوچتا ہوں اسے
کہ اس سے آگے تصور محال ہے اس کا
ادھوری بات ہے ذکر مقیم شہر جنوب
ہر اک مسافر راہ شمال ہے اس کا
بدن کے دشت میں اس کی ہی گونج ہے ہر سو
جواب اس کے ہیں ہر اک سوال ہے اس کا
اسی کا ہے یہ بھرا شہر دشت خالی بھی
یہ بھیڑ اس کی ہے قحط الرجال ہے اس کا
میں سوچتا ہوں کہ تصویر خاک کو میری
ہزار رنگ میں رنگنا کمال ہے اس کا
وہ آئنہ بھی حسنؔ اس کے فن کا جادو ہے
یہ چہرہ بھی ہنر لا زوال ہے اس کا
غزل
جو نقش برگ کرم ڈال ڈال ہے اس کا
حسن عزیز