Jo meri pusht mein paiwast hai us tir ko dekh

jo meri pusht mein paiwast hai us tir ko dekh
kitni KHush-rang nazar aati hai taswir ko dekh

raqs karta hua maqtal mein chala aaya hun
panw mat dekh mere panw ki zanjir ko dekh

koi neza mere sine mein alam hota hai
meri shah-e-rag pe chamakti hui shamshir ko dekh

KHud ko ijad main karta hun nae tarz pe rose
ai meri jaan kabhi tu meri tamir ko dekh

meri aankhon mein kisi KHwab ne dam toD diya
meri palkon se ulajhti hui tabir ko dekh

kya hai duniya ke KHarabaat mein wahshat ke siwa
mujh mein aabaad mere shahr-e-asatir ko dekh

itni ujlat thi ki main KHud ko wahin chhoD aaya
kaun deta hai sada kucha-e-taKHir ko dekh

mere alfaz ki duniya ki kabhi sair to kar
hum se kuchh KHak-nashinon ki bhi jagir ko dekh

dekh 'shahid' ko samajhna koi aasan nahin
itna dushwar nahin hun meri tahrir ko dekh