جس کوں درد جگر کی لذت ہے

جس کوں درد جگر کی لذت ہے
زہر اس کوں مثال امرت ہے

دیکھ تجھ ناز کی نزاکت کوں
نگہت گل شہید حیرت ہے

کم نمائی سیں اس قمر رو کوں
ماہ نو کی مثال شہرت ہے

میری آنکھوں میں یار کی تصویر
عکس آئینۂ محبت ہے

جھانجھ میں کیوں نہ آوے دل میرا
تجھ جدائی کی مجھ کو نوبت ہے

کیا چکا بو ہے زلف میں تیری
آرسی جس کوں دیکھ چکرت ہے

وصل میں اضطراب جاتا نہیں
سو قرن مجھ کوں ایک ساعت ہے

مثل آئینہ کر نمد پوشی
صافیٔ سینہ ترک زینت ہے

پھر پتنگوں کا شور اٹھا سراجؔ
جلوۂ شمع رو قیامت ہے