جچا نہ کچھ بھی نگاہوں کو منتہا کے سوا

جچا نہ کچھ بھی نگاہوں کو منتہا کے سوا
جھکا یہ سر نہ کہیں ان کے نقش پا کے سوا

ہزار منتیں کیں لاکھ ہاتھ پھیلائے
ملا نہ کچھ بھی مگر زخم التجا کے سوا

سوائے اس کے نہیں اور کچھ بھی پاس مرے
تجھے میں دوں بھی تو کیا دوست اب دعا کے سوا

یہی ہوس ہے کہ سارا جہاں ہو زیر نگیں
جہاں میں کچھ بھی نہیں اور اس ہوا کے سوا

خلوص شرط ہے اول بھی اور آخر بھی
دیار عشق میں سب ہیچ ہے وفا کے سوا

لبوں پہ حرف وفا ہے دلوں میں بیر مگر
کہوں میں کیا اسے یاروں کی اک ادا کے سوا

عزیز کیوں نہ ہو اے چاندؔ مجھ کو یہ دولت
بچا بھی کیا ہے مرے پاس اب انا کے سوا