Ishq mein zillat hui KHiffat hui tohmat hui

ishq mein zillat hui KHiffat hui tohmat hui
aaKHir aaKHir jaan di yaron ne ye sohbat hui

aks us be-did ka to muttasil paDta tha subh
din chaDhe kya jaanun aaine ki kya surat hui

lauh-e-sina par meri sau neza-e-KHatti lage
KHastagi is dil-shikasta ki isi babat hui

kholte hi aankhen phir yan mundni hum ko paDin
did kya koi kare wo kis qadar mohlat hui

panw mera kalba-e-ahzan mein ab rahta nahin
rafta rafta us taraf jaane ki mujh ko lat hui

mar gaya aawara ho kar main to jaise gard-baad
par jise ye waqia pahuncha use wahshat hui

shad o KHush-tale koi hoga kisu ko chah kar
main to kulfat mein raha jab se mujhe ulfat hui

dil ka jaana aaj kal taza hua ho to kahun
guzre us bhi sanehe ko ham-nashin muddat hui

shauq-e-dil hum na-tawanon ka likha jata hai kab
ab talak aap hi pahunchne ki agar taqat hui

kya kaf-e-dast ek maidan tha bayaban ishq ka
jaan se jab us mein guzre tab hamein rahat hui

yun to hum aajiz-tarin-e-KHalq-e-alam hain wale
dekhiyo qudrat KHuda ki gar hamein qudrat hui

gosh zad chaT-paT hi marna ishq mein apne hua
kis ko is bimari-e-jaankah se fursat hui

be-zaban jo kahte hain mujh ko so chup rah jaenge
marke mein hashr ke gar baat ki ruKHsat hui

hum na kahte the ki naqsh us ka nahin naqqash sahl
chand sara lag gaya tab nim-ruKH surat hui

is ghazal par sham se to sufiyon ko wajd tha
phir nahin malum kuchh majlis ki kya haalat hui

kam kisu ko 'mir' ki mayyat ki hath aai namaz
nash par us be-sar-o-pa ki bala kasrat hui