اک ضرورت ہے جو تحویل تک آ پہنچی ہے

اک ضرورت ہے جو تحویل تک آ پہنچی ہے
ہر حقیقت یہاں تمثیل تک آ پہنچی ہے

اب اخوت پہ بھروسہ نہیں کرتی دنیا
آگہی نیت قابیل تک آ پہنچی ہے

اے مرے مونس و غم خوار مجھے مرنے دے
بات اب حکم کی تعمیل تک آ پہنچی ہے

اب سخن ور ہی نہیں خود کو مصور لکھیے
شاعری اب فن تشکیل تک آ پہنچی ہے

کوشش امن و اماں میں ہی یہاں لوگوں کی
زندگی شورش تاویل تک آ پہنچی ہے

بے حسی دیکھیے اس دور کے انسانوں کی
جسم کیا روح کی تحلیل تک آ پہنچی ہے

فکر مصداقؔ نے ہے خاص مسافت کر لی
آپ کی آنکھ بھی اس جھیل تک آ پہنچی ہے