ہجوم درد میں خنداں ہے کون میرے سوا

ہجوم درد میں خنداں ہے کون میرے سوا
حریف گردش دوراں ہے کون میرے سوا

دوائے دل کے لیے اپنے پاس آیا ہوں
کہ میرے درد کا درماں ہے کون میرے سوا

یہ ہم سفر تو چمن تک کے ہم سفر ٹھہرے
مرا رفیق بیاباں ہے کون میرے سوا

ستارۂ شب غم کس پہ مسکرائیں گے
فریب خوردۂ پیماں ہے کون میرے سوا

وہ آدمی ہی تو انسانیت کا دشمن ہے
جو کہہ رہا ہے کہ انساں ہے کون میرے سوا

پکارتی ہیں مجھی کو تمام زنجیریں
زبان حلقۂ زنداں ہے کون میرے سوا

مرا پتہ تو کسی گل سے پوچھ لو کہ شمیمؔ
چمن میں چاک گریباں ہے کون میرے سوا