Hue hain ja ke aashiq ab to hum us shoKH chanchal ke

hue hain ja ke aashiq ab to hum us shoKH chanchal ke
sitamgar be-murawwat be-wafa be-rahm achpal ke

ghazalon ko teri aankhen se kuchh nisbat nahin hargiz
ki ye aahu hain shahri aur we wahshi hain jangal ke

giraftari hui hai dil ko mere be-tarah is se
ki aae pech mein kahte hi un ki zulf ke bal ke

ye daulat-mand agar shab ko nahin yaro to phir kya hai
ki hain ye chandni raaton ko bhi muhtaj mishal ke

tumhaare dard-e-sar se sandali-rango agar ji dun
tu chhape qabr par dena meri tum aa ke sandal ke

koi is ko kahe hai dam kui zanjir kui sumbul
hazaron nam hain kafir teri zulf-e-musalsal ke

bayaban ban hamein ulfat nahin hai shahr se hargiz
tarah majnun ke 'taban' hum to diwane hain jangal ke