ہر گام پہ آوارگی و در بدری میں

ہر گام پہ آوارگی و در بدری میں
اک دھیان کا سایہ ہے مری ہم سفری میں

تا حد نظر پگھلی ہوئی ریت کا دریا
کس سمت نکل آئے ہیں یہ بے خبری میں

کس کی طرب انداز نظر گھول رہی ہے
اندوہ و غم و سوز مزاج بشری میں

کیا کوئی کہیں کنج خیابان سکوں ہے
اے دشت غم زیست تری بے شجری میں

اے قریۂ دل دیکھ گزرتی ہے اسی طور
ہر شہر پہ بربادی و زیر و زبری میں

اہل طلب و شوق زمانوں سے پڑے ہیں
عرصہ گہہ خود سوزی و حیراں نظری میں

لہرائے نہ لہرائے وہ اب برق خد و خال
اب ہم نہیں خار خس آشفتہ سری میں

اک ہمدم دیرینہ کی یادوں کی کسک ہے
خوشبوئے خوش انفاسئی باد سحری میں

نگراں مری جانب نگہ خوش ہنراں ہے
کچھ تو ہنر آخر ہے مری بے ہنری میں

اک تیشۂ صد پارہ کی صورت ہیں بشیرؔ اب
حاصل ید تولہ تھا جنہیں شیشہ‌ گری میں