har ek shab yunhi dekhengi su-e-dar aankhen
tujhe ganwa ke na soengi umr-bhar aankhen
tulu-e-subh se pahle hi bujh na jaen kahin
ye dasht-e-shab mein sitaron ki ham-safar aankhen
sitam ye kam to nahin dil giraftagi ke liye
main shahr bhar mein akela idhar-udhar aankhen
shumar us ki saKHawat ka kya karen ki wo shaKHs
charagh banTta phirta hai chhin kar aankhen
main zaKHm zaKHm hua jab to mujh pe bhed khula
ki pattharon ko samajhti rahin guhar aankhen
main apne ashk sanbhaalunga kab talak 'mohsin'
zamana sang-ba-kaf hai to shishagar aankhen
Ghazal
Har ek shab yunhi dekhengi su-e-dar aankhen
Mohsin Naqvi