Har-chand ki baat apni kab lutf se Khaali hai

har-chand ki baat apni kab lutf se KHali hai
par yar na samjhen to ye baat nirali hai

aaghosh mein hai wo aur pahlu mera KHali hai
mashuq mera goya taswir-e-KHyali hai

kya Dar hai agar us ne dar se mujhe uThwaya
kahte hain taghayyuri mein aashiq ki bahaali hai

baalin pe jab aaya hai bimar ki tu apne
tab ruh ke qabiz ne jaan us ki nikali hai

main haal bayan apna karta hun ghazal kah ke
is waste ab mera jo sher hai haali hai

mehndi ke lagane mein phurti ye nahin dekhi
zalim ne hatheli par sarson si jama li hai

har-chand ki parwana jal jaane mein hai aandhi
par shama bhi aatish mein ji jhonkne wali hai

mani ne shabih us ki kya soch ke khinchi thi
mu-e-kamar us ke ki taswir KHayali hai

zahir hai ki jage ho tum raat kahin rah kar
aankhon mein nashe ki to kuchh thoDi si lali hai

maqdur magar kab tha qurban hain hum us ke
daman ki tere jis ne ye jhonk sambhaali hai

ai 'mushafi' hai tera itna jo suKHan chaspan
kya tu ne jawan darzan ghar mein koi Dali hai