ہم راہ لطف چشم گریزاں بھی آئے گی

ہم راہ لطف چشم گریزاں بھی آئے گی
وہ آئیں گے تو گردش دوراں بھی آئے گی

نکلے گی بوئے زلف ہماری تلاش میں
صحرا میں اب ہوائے گلستاں بھی آئے گی

وہ جن کو اپنے ترک تعلق پہ ناز تھا
آج ان کو یاد صحبت یاراں بھی آئے گی

ہم خود ہی بے لباس رہے اس خیال سے
وحشت بڑھی تو سوئے گریباں بھی آئے گی

طے ہو چکا ہے سود و زیاں کا معاملہ
زخم آئیں گے تو لذت پیکاں بھی آئے گی

ڈھونڈھے گی سر برہنہ ہمیں دشت ہجر میں
اک دن جنوں میں غیرت جاناں بھی آئے گی

اے رہ نورد عشق سنبھل کر قدم بڑھا
اس راستے میں ظلمت ہجراں بھی آئے گی

وہ برق جو حدود نظر سے پرے رہی
وہ برق اب قریب رگ جاں بھی آئے گی

کٹ جائے گا یہ کرب شب غم بھی اے ظہیرؔ
صبح نشاط و فصل نگاراں بھی آئے گی