ہم اپنے ذہن پر پہلے اسے طاری کریں گے

ہم اپنے ذہن پر پہلے اسے طاری کریں گے
پھر اس کے بعد اپنے قلب کو جاری کریں گے

ہم اپنے ظاہر و باطن کا اندازہ لگا لیں
پھر اس کے سامنے جانے کی تیاری کریں گے

محبت ہم سے اس کو ہو گئی تو ٹھیک ورنہ
ہم اپنی ساکھ رکھنے کو اداکاری کریں گے

اب ایسی مفلسی میں کیا کہیں ہو آنا جانا
مگر کب تک ہم اس سے عذر بیماری کریں گے

مرے کس کام کے ہیں اب یہ کوے اور کبوتر
عبث برباد گھر کی چار دیواری کریں گے

بہت اچھا تری قربت میں گزرا آج کا دن
بس اب گھر جائیں گے اور کل کی تیاری کریں گے

یہاں اب لوگ محسنؔ زندگی کرتے کہاں ہیں
ذرا سے دکھ میں روئیں گے عزا داری کریں گے