hai tamanna-e-sair-e-bagh kise
gul se sazish kare dimagh kise
kis ka aalam kahan ke bagh o bahaar
apne aalam se hai faragh kise
us ke aawargan ko DhunDe hai KHalq
un ka milta hai yan suragh kise
itna be-sudh nahin main ai saqi
KHali deta hai tu ayagh kise
tujh bin ai wahshat-e-junun-e-bahaar
KHush lage hai ye bagh o ragh kise
lala dekh us ki chhab ko kahta tha
dagh par de gaya hai dagh kise
go andheri hai 'mushafi' shab-e-hijr
par hui KHwahish-e-charagh kise
Ghazal
Hai tamanna-e-sair-e-bagh kise
Mushafi Ghulam Hamdani