حامل عظمت فطرت دل انساں نکلا

حامل عظمت فطرت دل انساں نکلا
ہم جسے پھول سمجھتے تھے گلستاں نکلا

راس آئی نہ کسی کو بھی یہ محفل یا رب
کہ جو نکلا تری دنیا سے پریشاں نکلا

غنچہ و گل کو سکھا دوں گا مذاق پرواز
میں جو گلشن میں کسی روز پرافشاں نکلا

میں تو سمجھا تھا اسے بے خبر و مستغنی
وہ تو ہر ذرۂ عالم کا نگہباں نکلا

بے جنوں آئی تھی کیا فصل بہاری امسال
آستیں چاک ہوئی اور نہ گریباں نکلا

دل جسے مہر جہاں تاب سے اک نسبت تھی
ایک بجھتا سا چراغ تہ داماں نکلا

کبھی تر دامن آلائش دنیا نہ ہوا
زہے قسمت کہ میں آسودۂ طوفاں نکلا

جسے عشرت کدہ دہر سمجھتا تھا میں
آخر کار وہ اک خواب‌ پریشاں نکلا

گفتگو غنچۂ لب بستہ نے کی مجھ سے ضیاؔ
بہر‌ گلگشت جو میں سر بہ گریباں نکلا