گھر سے برقعہ جو الٹ وہ مہ تاباں نکلا

گھر سے برقعہ جو الٹ وہ مہ تاباں نکلا
چونک اٹھی خلق کہ ایں مہر درخشاں نکلا

مہ کو اور تجھ کو جو میزان خرد میں تولا
اس سے تو حسن میں اے یار دو چنداں نکلا

رہ گئے ہوش و حواس و خرد و طاقت سب
یوں ترے کوچے سے میں بے سر و ساماں نکلا

یاں تلک تیر مژہ کھائے ہیں میں نے اس کے
جائے سبزہ مرے مرقد پہ نیستاں نکلا

تیرے بیمار کی سنتے ہیں یہ حالت ہے کہ اب
جو گیا اس کی خبر کو سو وہ گریاں نکلا

واہ کیا توڑ تری تیر نگہ کا ہے کہ یار
جس کے سینہ میں لگا پشت سے پیکاں نکلا

سوزش دل کو بھی میرے نہ بجھایا تم نے
کام اتنا بھی نہ اے دیدۂ گریاں نکلا

فتح دیجو تو اسے یا شہ مرداں کہ ترا
ملک گیری کو جو ہے اب یہ سلیماںؔ نکلا